Scaena tertia. Olympio-Lysidamus

OL. Age tibicen, dum illam educunt huc novam nuptam foras,
suavi cantu concelebra omnem hanc plateam hymenaeo.
Hymen hymenaee o hymen.
LY. Quid agis, mea salus? OL. Esurio hercle, atque adeo hau salubriter.
LY. At ego amo. OL. At ego hercle nihili facio: tibi amor pro cibost,
mihi ieiunitate iam dudum intestina murmurant.
LY. Nam quid illaec nunc tam diu intus remorantur remeligines?
quasi ob industriam, quanto ego plus propero, procedit minus.
OL. Quid si etiam si suffundam hymenaeum, si qui citius prodeant?
LY. Censeo, et ego te adiutabo in nuptiis communibus.
LY. OL. Hymen hymenaee o hymen.
LY. Perii hercle ego miser, dirumpi hymenaeum cantando licet:
illo morbo quo dirumpi eupio, non est copia.
OL. Edepol ne tu, si equos esses, esses indomabilis.
LY. Quo argumento? OL. Nimis tenax es. LY. Num me expertu's uspiam?
OL. Di melius faciant. sed crepuit ostium, exitur foras.
LY. Di hercle me cupiunt servatum. iam oboluit Casinus procul.