119 - In huius vitae vanitatem

Damnati ac morituri in terrae claudimur omnes

carcere, in hoc mortem carcere nemo fugit,

carceris in multas describitur area partes,

inque aliis alii partibus aedificant.

Non aliter quam de regno de carcere certant.

In caeco cupidus carcere condit opes,

carcere obambulat hic vagus, hic vincitur in antro.

Hic servit, regit hic, hic canit, ille gemit.

Iam quoque dum carcer non tanquam carcer amatur,

hinc aliis alii mortibus extrahimur.