25 - Paulinus et Dryadia filii Paulini et Megentirae sororis filiae

Qui nomen vultumque patris, Pauline, gerebas,
amissi specimen qui genitoris eras;
propter quem luctus miserae decedere matris
coeperat, offerret cum tua forma patrem,
redderet et mores et moribus adderet illud,
Paulinus caruit quo pater, eloquium:
eriperis laetis et pubescentibus annis
crudaque adhuc matris pectora sollicitas.
flemus enim raptam thalami de sede sororem,
heu non maturo funere, Dryadiam:
flemus, ego in primis, qui matris avunculus ac vos
natorum tamquam diligo progeniem.
Illa manus inter genetricis et oscula patris
occidit, Hispana tu regione procul.
Quam tener et primo, nove flos, decerperis aevo,
nondum purpureas cinctus, ephebe, genas!
Quattuor ediderat nunc facta puerpera partus,
funera set tumulis iam geminata dedit.
Sit satis hoc, Pauline pater. Divisio facta est:
debetur matri cetera progenies.