| Table of Contents: Main - Work | Words: Alphabetical - Frequency - Inverse - Length - Statistics | Help | IntraText Library |
| Decimus Magnus Ausonius Epigrammaton Liber IntraText CT - Text |
Illyricis regnator aquis, tibi, Nile, secundus,
Danuvius laetum profero fonte caput.
Salvere Augustos iubeo natumque patremque,
armiferis alui quos ego Pannoniis
Nuntius Euxino iam nunc volo currere ponto,
ut sciat hoc superum cura secunda Valens,
caede fuga flammis stratos periisse Suebos
nec Rhenum Gallis limitis esse loco.
Quod si lege maris refluus mihi curreret amnis,
huc possem victos inde referre Gothos.