|
Et tu licet omnem iamdudum censum in
Christi pauperes Christo dives effuderis, tum et praeferas licet annis iuvenem,
moribus senem, sis etiam ingenio clarus, clarus eloquio, nihil in te tamen
primore loco magis suspexerim dilexerimque quam quod solitudinis sedem sic
concupisti; unde quia me respondere copiosius spatiosissimis ac facundissimis
litteris tuis saepe postulas, sufferas paulisper necesse est, cum sis sapiens,
insipientiam meam, dum recolo multimodam Domini gratiam erga hanc ipsam eremum
dilectam tuam. Eremum ergo recte incircumscriptum Dei nostri templum dixerim;
etenim quem certum est habitare in silentio, credendum est gaudere secreto.
Saepius se illic videndum sanctis suis praebuit et conciliante loco congressum
non est aspernatus humanum; in deserto quippe Moyses glorificato vulta Deum
conspicit, in deserto Helias vultum pavens, ne Deum
conspiciat, obvolvit; et quamvis omnia ipse tamquam sua revisitet neque uspiam
desit, tamen, ut aestimare licet peculiarius visitationem dignatur eremi et
caeli secretum.
|