1. Igitur Hebraei, qui in
Aegyptum devenerant, incredibile memoratu est quam cito numero aucti sint
multiplicataque progenie Aegyptum repleverint.
2. sed defuncto rege, qui eos
ob merita Ioseph benigne fovebat, succedentium regum imperio deprimebantur. nam
et opus durum aedificandarum civitatium eis impositum, et quia iam multitudo
abundans metuebatur, ne quandoque libertatem armis vindicarent, parvulos recens
editos aquis mergere edicto regio cogebantur.
3. nec dissimulari cruentum
imperium licebat. qua tempestate filia Pharaonis infantem in flumine repertum
nutriendum pro filio curavit; nomen puero Moyses dedit.
4. Moyses hic, cum viriles
annos ageret, conspicatur Hebraeum ab Aegyptio pulsari; quo permotus dolore.
fratrem ab iniuria vindicans, Aegyptium calce perculsum interemit.
5. mox supplicium e facto
metuens in terram Madian profugit; et apud Iothor sacerdotem regionis illius
diversatus filiam eius Sepphoram in matrimonium accepit exque ea duos filios
Gersam et Eliezer sustulit.
6. hoc tractu temporum Iob
fuit, lege naturae et agnitionem Dei et omnem iustitiam complexus, praedives
opibus atque eo illustrior, quod his neque integris corruptus neque amissis
depravatus est.
7. nam cum per diabolum exutus
bonis, filiis etiam esset orbatus, ad extremum diris ulceribus affectus, non
potuit vinci, ut prae doloris impatientia aliqua in parte peccaret.
8. mercedem denique divini
testimonii consecutus, sanitati redditus omnia quae amiserat in duplum recepit.
|