I. De Cnuth rege.

Antiquo Cnuth natus erat de sanguine regum,
Regibus innumeris viribus editior.
Sic insigne caput trino diademate cingit,
Dum Danos, Anglos, Northigenasque regit.
Quique cruentus erat et in hostes praedo superbus,
In sibi subjectos regis habebat opus.
Mensae saepe suae convivia festa relinquens,
Pauperibus monachis intererat socius.
Postposita pompa turbae mediator egentis,
Conservus servis serviit ille Dei.
Lux postrema sibi luxit duodena Novembris,
Et postrema dies fit sibi prima dies.