III. De Eaduardo rege.

Eadwardus, probitate potens, pietate verendus.
Seque suosque regens, rex erat egregius.
Formosam faciem, procerumque corpus habebat,
Laetitiam vultus, moribus exuperans.
Ejus opes magnae, nec earum novit abusum,
Et dives cunctis et sibi pauper erat.
Non bello, sed pace, suos exterruit hostes,
Praesumpsit pacem rumpere nemo suam.
Quinque dies anni referebat janua Jani,
Cum rex egrediens carnea templa finit.