VIII. De Walchero Dunelmensi episcopo.

Cor sapiens, justique tenax, et gloria morum,
Mortis causa tuae, praesul venerande, fuerint.
Invidiae tibi barbaries, quia dispare longe
Vivebas vita, quia morum inhonesta suorum
Virga justitiae vero dictante premebas;
Virtus est odiosa malis, correctio nequam,
Disciplina gravis semper nolentibus illam.
Nullus apud sordes mentis respectus honesti.
Ergo tibi nocuit fortemque bonumque manere.
Si nocuit, dico quod te super astra levavit.
Agni paschalis celebrabas gaudia festi,
Cum tu per gladios moriens, sed vivus abisti.