XIX. De Willelmo Fiscamnensi abbate.

Et verbo vitaque bona, Willelme, fuisti,
Ecclesiae sanctae filius atque pater.
Turris firma David, quae conterit alta Damasci,
Contra perversos arma tenens fidei.
Et decus et virtus supra fastigia cleri,
Et pudor in facie, gratia vocis erat.
Tu miseris, tu mendicis oculus pietatis,
Et subtracta tibi laetus ovansque dabas.
Sexta dies aderat quae praeveniebat Aprilem,
Cum de morte notat se sibi vera diem.

Explicit libellus domini Godefridi.