VI. De Mathilda regina.

Consilii virtus, decor oris, gratia verbi,
Gloria regnorum, posteritatis honor,
Te, regina, levant, rex, dux, comes amplius, ille
Composuit capiti qui diadema tuo.
Germanos Morinosque duces a patre trahebas,
Reges Francorum dat tibi mater avos.
Rex hostes bellando suos, tu pace tenebas,
Et tua pax bello constitit utilior.
Te sibi surreptam flebunt, regina Matildis,
Morte tua lapsi dives inopsque simul.
Istius vitae lux ultima, prima Novembris,
Alterius vitae prima, secunda tibi.