Caput XLI.

De contentionibus.

“Contendere cum superiori furiosum est vel periculosum, cum pari dubium, cum minore verecundum.”

 ³⁹⁶ Puto itaque utile contentiones fugere; et qui non potest potentioribus resistere, procuret sollicite, ut eisdem valeat placere. Et non solum contendere vel violenter resistere potentioribus est furiosum, sed etiam irasci cum potenti est periculosum; ait enim Seneca: “Potenti irasci periculum est quærere.” ³⁹⁷ Quare, si potentior aliquem læserit, tutius est illi læso potius pati, quam cum illo irasci; quod et Cato voluisse videtur, cum dixit:

Cede locum læsus fortunæ, cede potenti:

Lædere qui potuit, aliquando prodesse valebit.

 ³⁹⁸

Si ergo potens te lædat vel tecum irascatur, non ad vindictam, sed ad, “patientiæ portum”

 ³⁹⁹ recurras.