Caput XXVIII.

Quando et qualiter consilium sit retinendum.

Viso et cognito, quando et qualiter consilium sit capiendum sive assumendum, videamus, quando et qualiter consilium sit retinendum. Et certe consilium est retinendum, quando per probationem et experientiam apparuit bonum ac utile; nam, ut supra dixi, Paulus ait: “Omnia probate: quod bonum est tenete.”

 ²⁷⁸ Et tunc magna constantia illud retinere debes; ait enim Cato:

Constans et lenis, ut res expostulat, esto;

Temporibus mores sapiens sine crimine mutat.

 ²⁷⁹

Nam et Seneca, De Formula Honestæ Vitæ, dixit: “Mobilis esto non levis, constans non pertinax.”

 ²⁸⁰ Constanter ergo consilium servabis, non pertinaciter.