[CAPUT V.]

Per spem.

Per spem autem acquiritur amor et dilectio Dei. Spes est expectatio certa future beatitudinis. De qua spe namque dicitur, “Spera in Deo, et fac bonitatem.”¹⁴⁴ “Inquire pacem, et persequere eam.”¹⁴⁵ Et alibi, “Iacta cogitatum tuum in Domino, et ipse te enutriet.”¹⁴⁶ Et alibi, “Revela Domino viam tuam, et spera in eo, et ipse faciet.”¹⁴⁷

Salvat enim Dominus omnes sperantes in se, ut ait propheta: “Mirifica misericordias tuas, qui salvos facis sperantes in te.”¹⁴⁸ Nam sperantes firmiter in Domino ab eo proteguntur et liberantur ab eo, nec confunduntur, nec infirmantur, et ab eo redimuntur et pascuntur eciam in divitiis eius. Ut ait propheta, “Et sperent in te qui noverunt nomen tuum, quoniam non dereliquisti querentes te, Domine.”¹⁴⁹ Et alibi, “Deus meus, inpolluta via eius, eloquia Domini igne examinata, protector est omnium sperantium in se.”¹⁵⁰ Et alibi, “In te speraverunt patres nostri; speraverunt, et liberasti eos. Ad te clamaverunt, et salvi sunt; in te speraverunt, et non sunt confusi.”¹⁵¹ Et alibi, “Iudica me, quoniam ego in innocencia mea ingressus sum, in Domino sperans non infirmabor.”¹⁵² Et alibi, “In te, Domine, speravi; non confundar in aeternum; in iustitia tua libera me.”¹⁵³ Et alibi, “Redimet Dominus animas servorum suorum, et non dereliquid omnes qui sperant in eo.”¹⁵⁴ Et alibi, “Spera in Domino, et fac bonitatem: et inhabita terram, et pasceris in divitiis eiius.”¹⁵⁵ Et alibi, “Adiuvabit eos Dominus, et liberabit eos; et eruet eos a peccatoribus, et salvabit eos, quia speraverunt in eo.”¹⁵⁶ Et alibi dixit Apostolus in epistola ad Romanos, “Spe enim salvi facti sumus. Spes autem que videtur, non est spes.”¹⁵⁷ Et nota quod “spes est ultimum malorum solatium,”¹⁵⁸ ut dixit Seneca De Legalibus Institutis.