[CAPUT XIII.]

De amore senum et honore parentum et quomodo in senectute debeas te regere. Rubrica.

Herum quia paternus amor omnes alios excellit, ut mihi retribuas me patrem tuum pre ceteris hominibus debes diligere et revereri. Ut enim ait lex, “Bona et honesta persona patris filio semper debet videri.”³⁷⁷ Et sapiens Ecclesiasticus dixit, “Qui honorat patrem iocundabitur in filiis, et in die orationis sue exaudietur.”³⁷⁸ Alibi idem dixit,

Qui honorat patrem vita vivet longiori, et qui obedit patri refrigerabit matrem. Qui timet Dominum honorabit parentes, et quasi dominis serviet hiis qui se generaverunt. Et in opere, et sermones, et in omni patientia honora patrem tuum, ut superveniat tibi benedictio a illius in eternum maneat. Benedictio patris firmat domum filiorum; maledictio autem eradicat fundamentum. Ne glorieris in contumelio patris tui; non enim est tibi gloria sed confusio. Gloria enim hominis ex honore patris sui, et dedecus filii pater sine honore. Filii, suscipe senectutem patris tui, et ne contristes eum in vita sua. Et si defecerit consensu, veniam da ei, et ne spernas eum in tua virtute.³⁷⁹

Et alibi eciam dicitur, “Honora patrem tuum, et genitus matris tue ne obliviscaris: memento quoniam nisi per illos non fuisses; et retribue illis, quomodo et illi tibi.”³⁸⁰ Et eciam Apostolus in epistola ad Ephesios dixit, “Filii, obedite parentibus vestris in Domino: hoc enim iustum est. Honora patrem tuum, et matrem tuam, quod est mandatum primum in promissione: ut bene sit tibi, et longevus sis super terram.”³⁸¹ Et Cato dixit,

Dilige non egra caros pietate parentes

Nec matrem offendas, dum vis honus esse parenti.³⁸²

Et Ihesus filius Sirac dixit, “Quam male fame est qui relinquid patrem, et est maledictus a Deo qui exasperat matrem.”³⁸³ Et Martialis Coquus dixit,

Dilige si bonus est iuxta pietate parentem,

Si malus est, tollera, filius esto bonus.³⁸⁴

Iuxta illud, “Bonus non est qui malos tollerare non potest.”³⁸⁵ Et iterum Cato dixit,

Verbera cum tuleris discens aliquando magistri,

Fer patris imperium, cum verbis exit in iram.³⁸⁶