[CAPUT XX.]

De iniuria oblivioni tradenda.

De iniuria oblivioni tradenda dicit Dominus, “Michi vindictam, et ego retribuam.”⁵⁷⁹ Et Seneca epistolarum ait, “Iniurie oblivisci debemus, benefitii vero meminisse. Nam iniuriarum remedium est oblivio.”⁵⁸⁰ Et Ihesus filius Syrac dixit, “Onmis iniurie proximi ne memineris, et nichil agas in operibus iniurie.”⁵⁸¹ Omnino autem ab iniuria amici taliter obtemperes, ut eius amor nullatenus minuatur, et non solum ab iniurie [!] amici obtemperare debes, sed eciam ab iniuria cuiuslibet alterius. Multis enim minatur qui uni facit iniuriam. Et Cassiodorus dixit, “Iniuria unius compago tota conteritur.”⁵⁸² Et eciam Apostolus in epistola ad Collocenses ait, “Qui enim iniuriam facit, accipiet quod inique gessit.”⁵⁸³ Et Seneca epistolarum dixit, “Ab aliis expecta, quod alii feceris.”⁵⁸⁴

Cavere certe debes ne amor minuatur. Amor enim numquam in eodem statu permanet: aut enim crescit aut decrescit. Eo enim ipse quod durat inveteratur et crescit. Nam dicit Regula Amoris, “Si amor minuatur, cito decidit et raro convalescit.”⁵⁸⁵ Et Martialis Cocus dixit,

Prudenti, Probe, consilio est servandus,

Que sero acquiris, sed cito perdis eum.⁵⁸⁶