Blandior salutatio inter amantes.

Honoris gratia, aut secus.

       Salve here. Ohe, salve tu quoque, bone vir. Salve vir ornatissime, clarissime. Salve etiam atque etiam, literarum decus. Salve plurimum, amicorum optime. Salve mi Maecenas. Salve patrone singularis. Salve vir spectatissime. Salve unicum huius aetatis ornamentum. Salve Germaniae delicium. Salvete, quotquot estis, una salute omnes. Salvete pariter omnes. Salvete belli homunculi. Salve congerro lepidissime. Salve vini pernicies. Responsio. Salve et tu gurges, helluoque placentarum. Salve multum, virtutis omnis antistes. Responsio. Salve tantundem totius probitatis exemplar. Salve anicula annos nata quindecim. Responsio. Salve puella annorum octoginta. Bene sit tibi cum tuo calvitio. Responsio. Bene tibi cum lacero naso. Ut salutaris, ita resalutaberis. Si male dixeris peius audies. Salve iterum atque iterum. Responsio. Et tu salve perpetuum. Salve plus millies. Responsio. Equidem malim salvere semel. Salve, quantum vis. Responsio. Et tu quantum mereris. Salvere te iubeo. Quid si nolim? Equidem aegrotare malim, quam tua salute salvere.

In tertia persona.

      Sapidus Erasmo suo salutem dicit.
      Sapidus Beatum suum plurima salute impertit.