27. Quomodo quidam vir, in solo conspectu ejus, est contritus pro peccatis,
et satisfaciens liberatus.

Venerabilis Joannes Abbas Affligemiensis, cum secum quemdam virum ad piam Lutgardem duxisset; ille, aspectu illius, vultu anxio repercussus est. Miratus ergo Abbas cum ad remotiora venisset, dixit viro: Vidisti, ait, illam sanctam mulierem? Et ille, ex imo pectore suspiria trahens; Vidi, inquit, et in aspectu ejus, velut in aspectu Divinae majestatis, tanto horrore peccaminum sum percussus, ut ejus auxiliante suffragio peccatis eximar, nec Deo dante relabar. Quod ita factum, dictus Abbas memorabilis recordatur.