39. Quomodo duo Angeli visi sunt deducere eam ad altare; et alia vice ante mortem B.V. Mariae et B. Joannis Baptistae adstare ei ex utroque latere.

Ut autem aliquibus, quae minus forte digne de ea in Aquiria sentiebant, piae Lutgardis meritum monstraretur, accidit hoc miraculum solemne quod narro. Solita erat,omni die Dominico Dominici Corporis refici Sacramento. Cumque euntem ad altar nullus eam in subsidium debilis corporis sustentaret, manifeste viderunt aliquae, quibus videre datum est, duos eam Angelos mediam tenere, et ad altare deducere. Consimili modo et alia vice manifestissime visum est, gloriosissimam virginem Mariam, et beatum Joannem Baptistam, eam in obsequio comitari: sed hoc diupostea, cum scilicet tempus instaret, quo debuit ex hoc mundo transferri.