19. Quomodo ipsi cantanti Christus visus est applaudere, in specie agni.

At quoniam Lutgardem per omnia Agnum secutam diximus, videas quid Agnus rependerit. Fas enim est sponsum sponsae suae vicem rependere. Sed vide quemadmodum reddidit. In monasterio S. Catharinae, omni sexta feria in vespere sabbathi subsequentis, in venerationem beatissimae Virginis Mariae merito deputati, cum Versus super Responsorium cantabatur (cujus utique versum ob gratiam devotionis Lutgardis sola cantare solebat) videbatur ei interim dum cantaret, quod Christus in specie Agni super pectus suum se tali modo locaret, ut unum pedem super humerum ejus dexterum alium super sinistrum, et os suum ori illius imponeret: et sic sugendo de pectore illius mirabilis melodiae suavitatem extraheret. Nec dubitare quisquam poterat in hoc cantu, divinum adesse miraculum, cum in solo Versu illo vox in infinitum solito gratior audiretur. Unde et corda audientium ad devotionem interim mirabiliter movebantur.