18. Quam perfecte Agnum secuta fuerit Christum.

Ex hinc Sponso suo perfectius adhaerens, sequebatur Agnum quocumque iret: Si viam Christi humilem praedicamus; sequentem Lutgardem ita humilem videas, quam numquam superbia lacessivit. Si viam paupertatis intueor, adeo pauperem Lutgardem intelligas, quod nec quotidiani panis, quotidie tamen laborans manibus, alimoniam cogitaret. Si viam Christi in misericordia et pietate respiciam; misericordius aliquid Lutgarde in hac vita non vidi. Si viam Christi in tribulatione denuntiem; fatigationem Lutgardis in jejuniis et afflictionibus cogites, quam super omnes nostrae aetatis viros ac mulieres per totam vitam suam duxisse probabitur. Si viam Christi ad gloriam veneramur; Lutgardem conversatione in coelis positam, ut in praesentiarum videre est, incomparabiliter extollamus. In his omnibus perfectissime Petrus, in his et Maria Magdalena Agnum secuti sunt; non tamen quocumque ivit.Lutgardis autem, cohortes virgineas sequaces habens, illa incorruptionis via Agnum secuta est, qua praecessit.