55. Vide ergo, lector, quantis simus obnoxii, qui Christinam videmus tot tormenta, tot poenas non pro se sed pro proximis pertulisse; et nos pro nobis et nostris excessibus poenitentiam agere formidamus. Veniet certe dies, veniet, et non tardabit, quod nos majora iis libenter aggredi tentaremus, si locus poenitentiae daretur poscentibus, et ad neglecta [quondam] tempora redire liceret. Et vae iis, qui oleum misericordiae [tunc] volunt emere, quando tempus nundinarum pertransivit; et ideo lampade vacua pulsabunt ad januam, et nullum aditum obtinebunt; quin imo dicetur eis: Amen dico vobis, nescio vos. Vigilate ergo, quia nescitis diem neque horam.