Thomas of Cantimpré De S. Christina Mirabili Virgine Vita IntraText CT - Text
Caput I Sanctae Natales; Viso post mortem purgatorio, ad vitam redit, ut animas ibidem detentas juvet; quam acerba, illaeso corpore, pro eisdem sit passa.
5. Et factum est post haec, ut ex interno contemplationis
exercitio virtute corporis infirmata, vita excederet. Tunc positum in medio corpus exanime ab amicis, et
sororibus maxime lamentabatur. Mane ergo facto, ad ecclesiam deportatur. Cumque
pro depositione ejus Missarum oblatio fieret, subito commotum corpus exsurrexit
in feretro, statimque instar avis evecta templi trabes ascendit. Fugientibus
ergo cunctis, qui aderant, sola soror aetate major cum timore remansit [ubi]
usque post Missam immobilis perseverans a presbytero ecclesiae sacramento
constricta, est coacta descendere: horrebat enim, ut quidam autumant,
subtilitas ejus spiritus, odorem corporum humanorum. Mox cum sororibus reversa,
domi cibis refecta est. Tunc amici ejus spirituales, accedentes ad eam,
sciscitati sunt, [ut] quid vidisset, vel quid passa fuisset, vellet exponere.
[Quibus illa:]