Frag. XXXII.

Sic, contra rerum naturae munera nota,
Coruus maturis frugibus oua refert:
Sic format lingua foetum, cum protulit, vrsa,
Et piscis, nullo iunctus amore, parit.
Sic Phoebeia chelys, vinclo resoluta parentis,
Lucinae tepidis naribus ora fouet.
Sic sine concubitu textis apis excita ceris
Feruet, et audaci milite castra replet.
Non vno contenta valet natura tenore,
Sed permutatas gaudet habere vices.