TITULUS XV DE MAGISTERIO ECCLESIASTICO
CAPUT I DE ECCLESIAE MUNERE DOCENDI IN GENERE
Can.
595 - § 1. Ecclesiae, cui Christus Dominus depositum fidei
concredidit, ut Spiritu Sancto assistente veritatem revelatam sancte
custodiret, penitus perscrutaretur, fideliter annuntiaret atque exponeret, ius
nativum a qualibet humana potestate independens et obligatio est omnibus
hominibus Evangelium praedicandi. § 2. Ecclesiae competit semper et ubique
principia moralia, etiam ad ordinem socialem spectantia, annuntiare necnon
iudicium ferre de quibuslibet rebus humanis, quatenus dignitas personae humanae
eiusque iura fundamentalia aut salus animarum id exigunt.
Can. 596 - In nomine Ecclesiae docendi munus
solis Episcopis competit; in eodem tamen munere partem habent ad normam iuris
sive ii, qui Episcoporum per ordinem sacrum effecti sunt cooperatores, sive ii,
qui in ordine sacro non constituti mandatum docendi receperunt.
Can. 597 - § 1. Infallibitate in magisterio
vi muneris sui gaudet Romanus Pontifex, si ut supremus omnium christifidelium
Pastor et Doctor, cuius est fratres suos in fide confirmare, doctrinam de fide
vel de moribus tenendam definitivo actu proclamat. § 2. Infallibilitate
in magisterio pollet quoque Collegium Episcoporum, si magisterium exercent
Episcopi in Concilio Oecumenico coadunati, qui ut fidei et morum doctores et
iudices pro universa Ecclesia doctrinam de fide vel de moribus ut definitive
tenendam declarant, aut si per orbem dispersi communionis nexum inter se et cum
sancti Petri successore servantes una cum eodem Romano Pontifice authentice res
fidei vel morum docentes in unam sententiam tamquam definitive tenendam
conveniunt. § 3. Infallibiliter definita nulla intellegitur doctrina, nisi id
manifesto constat.
Can. 598 - Fide divina et catholica ea omnia
credenda sunt, quae verbo Dei scripto vel tradito, uno scilicet deposito fidei
Ecclesiae commisso, continentur et simul ut divinitus revelata proponuntur sive
ab Ecclesiae magisterio sollemni sive ab eius magisterio ordinario et
universali, quod quidem communi adhaesione christifidelium sub ductu sacri
magisterii manifestatur; tenentur igitur omnes christifideles; quascumque
devitare doctrinas eisdem contrarias.
Can. 599 - Non quidem fidei assensus,
religiosum tamen intellectus et voluntatis obsequium praestandum est doctrinae
de fide et de moribus, quam sive Romanus Pontifex sive Collegium Episcoporum enuntiant,
cum magisterium authenticum exercent, etsi definitivo actu eandem proclamare
non intendunt; christifideles ergo curent, ut devitent, quae cum eadem non
congruunt.
Can. 600 - Episcopi, qui sunt in communione
cum Collegii capite et membris, sive singuli sive in Synodis aut in Conciliis
particularibus congregati, etsi infallibilitate in docendo non pollent,
christifidelium suae curae commissorum authentici sunt fidei doctores et
magistri; cui magisterio authentico suorum Episcoporum christifideles religioso
animi obsequio adhaerere tenentur.
Can. 601 - Singulis Ecclesiis onus incumbit
imprimis a Patriarchis et Episcopis exercendum modo unicuique generationi et
culturae accommodato ad perennes hominum interrogationes de sensu vitae
respondendi necnon christianae solutioni problematum urgentiorum sub luce
Evangelii signa temporum perscrutando consulendi ita, ut clarescat ubique magis
lux Christi illuminans omnes homines.
Can. 602 - In cura pastorali non tantum
principia scientiarum sacrarum, sed etiam inventa aliarum scientiarum
agnoscantur et ita adhibeantur, ut christifideles ad magis consciam et reflexam
vitam fidei ducantur.
Can. 603 - Litterarum artiumque cultus pro
earum vi ad sensum fidei singulari efficacia exprimendum et communicandum
agnitis iusta libertate et diversitate culturali provehatur.
Can. 604 - Ecclesiae Pastorum imprimis est
sedulo curare, ut inter varietates enuntiationum doctrinae in variis Ecclesiis
idem sensus fidei servetur atque promoveatur ita, ut integritas et unitas fidei
damnum non patiatur, immo catholicitas Ecclesiae per legitimam diversitatem in
meliorem lucem ponatur.
Can. 605 - Ad Episcopos praesertim in
Synodis vel Consiliis coadunatos, singulariter vero ad Sedem Apostolicam
pertinet integritatem et unitatem fidei bonosque mores auctoritative promovere,
custodire et religiose defendere, etiam reprobando, quatenus opus est,
sententias, quae eisdem contrariae sunt, vel monendo de eis, quae eadem in
discrimen ponere possunt.
Can. 606 - § 1. Theologorum est pro sua
mysterii salutis profundiore intellegentia et scientiarum sacrarum affiniumque
necnon novarum quaestionum peritia fideliter magisterio Ecclesiae authentico
obsequentes simulque ea, qua par est, libertate utentes fidem Ecclesiae
illustrare et defendere progressuique doctrinali consulere. § 2. In veritatibus
theologicis investigandis et exprimendis eorum est communitatis fidei
aedificandae sollicitos esse atque cum Episcopis in eorum munere docendi
sollerter cooperari. § 3. Qui in theologicas disciplinas praesertim in
seminariis, studiorum universitatibus et facultatibus incumbunt, cum hominibus,
qui in aliis scientiis excellunt, collatis consiliis atque viribus cooperari
studeant.
|