Art. III DE IMPEDIMENTIS IN SPECIE
Can.
800 - § 1. Vir ante decimum sextum aetatis annum expletum, mulier
ante decimum quartum aetatis annum expletum matrimonium valide celebrare non
possunt. § 2. Integrum est iuri particulari Ecclesiae sui iuris aetatis annum
superiorem ad licitam matrimonii celebrationem statuere. Can.
801 - § 1. Impotentia coeundi antecedens et perpetua sive ex parte
viri sive ex parte mulieris sive absoluta sive relativa matrimonium ex ipsa
eius natura dirimit. § 2. Si impedimentum impotentiae dubium est sive dubio
iuris sive dubio facti, matrimonium non est impediendum nec stante dubio nullum
declarandum. § 3. Sterilitas
matrimonium nec prohibet nec dirimit firmo can. 821.
Can. 802 - § 1. Invalide matrimonium
attentat, qui vinculo tenetur prioris matrimonii. § 2. Etsi prius matrimoniam
invalidum aut solutum est qualibet ex causa, non licet aliud matrimonium
celebrare, antequam de prioris invaliditate aut solutione legitime et certo
constat.
Can. 803 - § 1. Matrimonium cum non
baptizatis valide celebrari non potest. § 2. Si pars tempore celebrati
matrimonii tamquam baptizata communiter habebatur aut eius baptismus erat
dubius, praesumenda est ad normam can. 779 validitas matrimonii, donec certo
probetur alteram partem baptizatam esse, alteram vero non baptizatam. § 3.
Circa condiciones dispensandi applicetur can. 814.
Can. 804 - Invalide matrimonium attentat,
qui in ordine sacro est constitutus.
Can. 805 - Invalide matrimonium attentat,
qui votum publicum perpetuum castitatis in instituto religioso emisit. Can.
806 - Cum persona abducta vel saltem retenta intuitu matrimonii cum
ea celebrandi matrimonium valide celebrari non potest, nisi postea illa ab
abducente vel retinente separata et in loco tuto ac libero constituta
matrimonium sua sponte eligit.
Can. 807 - § 1. Qui intuitu matrimonii cum
certa persona celebrandi eius coniugi vel proprio coniugi mortem intulit,
invalide hoc matrimonium attentat. § 2. Invalide quoque matrimonium inter se
attentant, qui mutua opera physica vel morali mortem coniugi intulerunt.
Can. 808 - § 1. In linea recta consanguinitatis matrimonium
invalidum est inter omnes ascendentes et descendentes. § 2. In linea
collaterali invalidum est usque ad quartum gradum inclusive. § 3. Numquam
matrimonium permittatur, si quod subest dubium, num partes sint consanguineae
in aliquo gradu lineae rectae aut in secundo gradu lineae collateralis. § 4.
Impedimentum consanguinitatis non multiplicatur.
Can. 809 - § 1. Affinitas matrimonium
dirimit in quolibet gradu lineae rectae et in secundo gradu lineae
collateralis. § 2. Impedimentum affinitatis non multiplicatur.
Can. 810 - § 1. Impedimentum publicae
honestatis oritur: 1° ex matrimonio invalido post instauratam vitam communem;
2° ex notorio vel publico concubinatu; 3° ex instauratione vitae communis
eorum, qui ad formam celebrationis matrimonii iure praescriptam astricti
matrimonium attentaverunt coram officiali civili aut ministro acatholico. § 2.
Hoc impedimentum matrimonium dirimit in primo gradu lineae rectae inter virum
et consanguineas mulieris itemque inter mulierem et viri consanguineos. Can.
811 - § 1. Ex baptismo oritur inter patrinum et baptizatum eiusque
parentes cognatio spiritualis, quae matrimonium dirimit. § 2. Si iteratur
baptismus sub condicione, cognatio spiritualis non oritur, nisi iterum idem
patrinus adhibitus est.
Can. 812 - Matrimonium inter se valide
celebrare non possunt, qui cognatione legali ex adoptione orta in linea recta
aut in secundo gradu lineae collateralis coniuncti sunt.
|