Art. II DE LOCIS SACRIS
Can. 868 - Loca sacra, quae ad cultum
divinum destinantur, nonnisi de licentia Episcopi eparchialis erigi possunt,
nisi aliud iure communi expresse statuitur.
1° De ecclesiis
Can. 869 - Ecclesia est aedes exclusive
cultui divino dedicata consecratione vel benedictione.
Can. 870 - Nulla aedes ad ecclesiam
destinata aedificetur sine expresso Episcopi eparchialis consensu scripto dato,
nisi aliter iure communi cavetur.
Can. 871 - § 1. Consecratione dedicentur
ecclesiae cathedrales et, si fieri potest, ecclesiae paroeciales, ecclesiae
monasteriorum et ecclesiae domui religiosae adnexae. § 2. Consecratio
reservatur Episcopo eparchiali, qui potest alii Episcopo facultatem ecclesiam
consecrandi conferre; de peracta consecratione vel benedictione ecclesiae
redigatur documentum in archivo curiae eparchialis asservandum.
Can. 872 - § 1. Arcendum est ab ecclesiis, quidquid
a loci sanctitate absonum est. § 2. Curent omnes, ad quos pertinet, ut in
ecclesiis illa munditia servetur, quae domum Dei decet, mediaque securitatis
adhibeantur ad res sacras et pretiosas tuendas.
Can. 873 - § 1. Si qua ecclesia nullo modo
amplius ad cultum divinum adhiberi potest et possibilitas non datur eam
reficiendi, ab Episcopo eparchiali in usum profanum non sordidum redigi potest.
§ 2. Si aliae graves causae suadent, ut aliqua ecclesia ad cultum divinum
amplius non adhibeatur, Episcopus eparchialis eam in usum profanum non sordidum
redigere potest consulto consilio presbyterali, de consensu eorum, qui iura in
eandem sibi legitime vindicant, et dummodo salus animarum nihil inde detrimenti
capiat.
2° De coemeteriis et de exsequiis
ecclesiasticis
Can.
874 - § 1. Ius est Ecclesiae catholicae possidendi propria
coemeteria. § 2. Coemeteria Ecclesiae propria, ubi fieri potest, habeantur vel
saltem spatia in coemeteriis civilibus christifidelibus defunctis destinata
alterutra benedicenda; si vero haec obtineri non possunt, occasione exsequiarum
tumulus benedicetur. § 3. In ecclesiis defuncti ne sepeliantur reprobata
contraria consuetudine, nisi de eis agitur, qui Patriarchae, Episcopi vel
Exarchi fuerunt. § 4. Paroeciae, monasteria ceteraque instituta religiosa
propria coemeteria habere possunt.
Can. 875 - Exsequiis ecclesiasticis, quibus
Ecclesia defunctis spiritualem opem impetrat, eorum corpora honorat simulque
vivis spei solacium affert, omnes christifideles et catechumeni defuncti donari
debent, nisi eisdem iure privati sunt.
Can. 876 - § 1. Concedi possunt exsequiae
ecclesiasticae acatholicis baptizatis de prudenti Hierarchae loci iudicio, nisi
constat de contraria eorum voluntate et dummodo minister proprius haberi non
possit. § 2. Parvuli, quos parentes baptizare intendebant, aliique, qui aliquo
modo Ecclesiae propinqui videbantur, sed antequam baptismum susceperunt,
decesserunt, exsequiis ecclesiasticis item de prudenti Hierarchae loci iudicio
donari possunt. § 3. Illis, qui proprii cadaveris cremationem elegerunt, nisi
constat eos id fecisse rationibus ductos vitae christianae adversis,
concedendae sunt exsequiae ecclesiasticae eo tamen modo celebratae, ut non
lateat Ecclesiam corporum sepulturam cremationi anteponere utque scandalum
vitetur.
Can. 877 - Exsequiis ecclesiasticis privandi
sunt, nisi ante mortem aliqua dederunt paenitentiae signa, peccatores, quibus
eaedem non sine publico christifidelium scandalo concedi possunt. Can.
878 - § 1. In exsequiarum ecclesiasticarum celebratione omnis
personarum acceptio vitetur. § 2. Firmo can. 1013 enixe commendatur, ut
Episcopi eparchiales, quatenus fieri potest, praxim introducant, secundum quam
occasione exsequiarum ecclesiasticarum solum eae oblationes recipiantur, quas
christifideles sua sponte offerunt.
Can. 879 - Expleta tumulatione adnotatio in
libro defunctorum fiat ad normam iuris particularis.
|