TITULUS XXII DE RECURSIBUS
ADVERSUS DECRETA ADMINISTRATIVA
Can. 996
- Quae in canonibus huius tituli de decretis statuuntur, applicanda sunt ad
omnes actus administrativos singulares, qui in foro externo ex quavis legitima
potestate in Ecclesia extra iudicium ponuntur, eis exceptis, qui a Romano
Pontifice vel a Concilio Oecumenico feruntur.
Can. 997 - § 1 Qui se decreto gravatum esse
censet, potest ad auctoritatem superiorem ei, qui hoc decretum tulit, ad normam
iuris recurrere. § 2. Primus recursus adversus decreta Protosyncelli vel
Syncellorum ad Episcopum eparchialem interponitur, adversus vero decreta eorum,
qui ex potestate delegata agunt, ad delegantem.
Can. 998 - § 1. Valde optandum est, ut, si
quis gravatum se decreto putat, non fiat inter ipsum et decreti auctorem
contentio, sed inter eos de aequa solutione quaerenda tractetur, gravibus
quoque hominibus ad mediationem vel studium forte adhibitis ita, ut per
voluntariam decreti emendationem vel per iustam compensationem vel per aliam
idoneam viam controversia dirimatur. § 2. De his auctoritas superior partes hortetur, antequam recursum
recipit.
Can. 999 - § 1. Antequam aliquis recursum
interponit, debet revocationem vel emendationem decreti scripto ab eiusdem
auctore petere intra peremptorium terminum decem dierum a die intimationis
decreti computandum; qua petitione facta etiam suspensio exsecutionis ipso iure
petita intellegitur. § 2. Obligatio petendi revocationem vel emendationem
decreti non urget, si agitur de primo recursu adversus decreta, de quibus in
can. 997, § 2, vel si agitur de ulterioribus recursibus exceptis recursibus
adversus decreta Episcopi Eparchialis, quibus quivis primus recursus decisus
est.
Can. 1000 - § 1. In casibus, in quibus
recursus suspendit decreti exsecutionem, idem efficit etiam petitio, de qua in
can. 999, § 1. § 2. In ceteris casibus, nisi intra decem dies a recepta
petitione computandos auctor decreti exsecutionem eius suspendit, potest
suspensio interim peti ab auctoritate superiore, quae eam decernere potest
tantum gravi de causa et cauto, ne quid salus animarum detrimenti capiat; si
postea recursus interponitur, auctoritas, quae de recursu videt, decernat,
utrum suspensio exsecutionis decreti sit confirmanda an revocanda. § 3. Si
nullus recursus intra statutum terminum adversus decretum interpositus est vel
si recursus tantum ad petendam reparationem damnorum interpositus est,
suspensio exsecutionis decreti ipso iure cessat.
Can. 1001 - § 1. Recursus interponi debet
intra peremptorium terminum quindecim dierum. § 2. Terminus quindecim dierum
decurrit: 1° in casu, in quo petitio revocationis vel emendationis decreti
praemittenda est, ex die intimationis decreti, quo auctor prius decretum
emendavit vel petitionem reiecit, aut, si nihil decrevit, ex tricesimo die a
recepta petitione computando; 2° in ceteris casibus ex die, quo decretum
intimatum est.
Can. 1002 - Auctoritas superior decretum,
quo recursus deciditur, intra sexaginta dies a recepto recursu computandos
ferre debet, nisi ius particulare propriae Ecclesiae sui iuris alios terminos
statuit; si vero hoc factum non est et recurrens scripto petit, ut hoc decretum
feratur, tricesimo die ab hac petitione recepta computando, si etiam tunc nihil
factum est, recursus pro reiecto habetur ac si eo die per decretum reiectus sit
ita, ut novus recursus adversus eum interponi possit.
Can. 1003 - In recursibus adversus decreta
administrativa servetur congrua congruis referendo can. 1517; recurrens semper
ius habet procuratorem vel advocatum adhibendi vitatis inutilibus moris; immo
patronus ex officio constituatur, si recurrens patrono caret et auctoritas
superior eum necessarium censet; semper tamen potest auctoritas superior iubere
recurrentem ipsum comparere, ut interrogetur.
Can. 1004 - Auctoritas superior, quae de
recursu videt, potest decretum non solum confirmare vel nullum declarare, sed
etiam rescindere et revocare, non vero emendare, nisi iure particulari propriae
Ecclesiae sui iuris etiam haec potestas auctoritati superiori tribuitur.
Can. 1005 - Etsi decretum ab auctoritate
superiore confirmatum, nullum declaratum, rescissum, revocatum vel emendatum
est, de reparatione damnorum, si forte debetur, respondit ille, qui primum
decretum tulit; auctoritas superior vero eatenus tantum respondet, quatenus ex
suo decreto damna obvenerunt.
Can. 1006 - Recursus adversus decretum
administrativum Patriarchae, etsi agitur de decreto, quod eparchiam Patriarchae
respicit, vel de decreto, quo Patriarcha recursum decidit, fit ad specialem
coetum Episcoporum ad normam iuris particularis constituendum, nisi quaestio ad
Sedem Apostolicam defertur; adversus decisionem huius coetus non datur ulterior
recursus salva provocatione ad ipsum Romanum Pontificem.
|