Art. VIII DE IUDICIS PRONUNTIATIONIBUS
Can. 1290 - Causa iudiciali modo
pertractata, si est principalis, definitur a iudice per sententiam definitivam;
si est incidens, per sententiam interlocutoriam firmo can. 1269, § 1.
Can. 1291 - § 1. Ad pronuntiationem
cuiuslibet sententiae requiritur in iudicis animo moralis certitudo circa rem
sententia definiendam. § 2. Hanc
certitudinem iudex haurire debet ex actis et probatis. § 3. Probationes autem
aestimare iudex debet ex sua conscientia firmis praescriptis legis de quarundam
probationum efficacia. § 4. Iudex, qui eam certitudinem adipisci non potuit,
pronuntiet non constare de iure actoris et partem conventam absolutam dimittat,
nisi agitur de causa favore iuris fruente, quo in casu pro eadem pronuntiandum
est.
Can. 1292 - § 1. In tribunali collegiali,
quo die et hora iudices ad deliberandum conveniant, collegii praeses statuat
et, nisi specialis causa aliud suadet, in ipsa sede tribunalis conventus
habeatur, cui nemo praeter collegii iudices adesse potest. § 2. Assignato
conventui die singuli iudices scripto, sed reticito nomine afferant
conclusiones suas in merito causae et rationes tam in iure quam in facto,
quibus ad conclusionem suam venerunt; quae conclusiones cum notula de earum
authenticitate ab omnibus iudicibus subscripta actis causae adiungantur secreto
servandae firma § 4. § 3. Prolatis ex ordine singulorum iudicum conclusionibus
secundum praecedentiam, ita tamen, ut semper a causae ponente initium fiat,
habeatur discussio sub tribunalis praesidis ductu, praesertim ut
constabiliatur, quid statuendum sit in parte dispositiva sententiae. §
4. In discussione autem unicuique licet a pristina sua conclusione recedere;
iudex vero, qui ad decisionem aliorum accedere noluit, exigere potest, ut, si
fit appellatio, conclusiones omnium iudicum reticitis nominibus ad tribunal
superius mittantur. § 5. Si vero indices in prima discussione ad sententiam
devenire aut nolunt aut non possunt, differri potest decisio ad novum conventum
non tamen ultra hebdomadam, nisi ad normam can. 1283 complenda est causae
instructio.
Can. 1293 - § 1. Si iudex est unicus, ipse
sententiam redigit. § 2. In tribunali collegiali sententia redigenda est
desumendo motiva ex eis, quae singuli iudices in discussione attulerunt, nisi a
maiore numero iudicum definita sunt motiva praeferenda; sententia deinde
singulorum iudicum approbationi subicienda est. § 3. Sententia edenda est non
ultra mensem computandum a die, quo causa definita est, nisi in tribunali
collegiali iudices gravi ex ratione longius tempus praestituerunt.
Can. 1294 - Sententia debet: 1° definire
controversiam coram tribunali agitatam data singulis dubiis congrua
responsione; 2° definire, quae sint partium obligationes ex iudicio ortae et
quomodo implendae sint; 3° exponere rationes seu motiva tam in iure quam in
facto, quibus pars dispositiva sententiae innititur; 4° statuere de expensis
iudicialibus.
Can. 1295 - § 1. Sententia post divini
Nominis invocationem exprimat oportet ex ordine, quis sit iudex aut quid
tribunal, quis sit actor, pars conventa, procurator, nominibus et domiciliis
accurate designatis, promotor iustitiae, defensor vinculi, si partem in iudicio
habuerunt. § 2. Referre postea debet breviter facti speciem cum partium
conclusionibus et formula dubiorum. § 3. Haec subsequatur pars dispositiva sententiae
praemissis rationibus, quibus innititur. § 4. Claudatur cum indicatione loci et
diei, in quibus lata est, et cum subscriptione iudicis vel, si de tribunali
collegiali agitur, omnium iudicum et notarii.
Can. 1296 - Normae de sententia definitiva
statutae valent congrua congruis referendo etiam de sententia interlocutoria. Can.
1297 - Sententia quam primum intimetur indicatis terminis, intra quos
appellatio a sententia interponi potest, neque ante intimationem vini ullam
habet, etsi pars dispositiva sententiae iudice permittente partibus notificata
est.
Can. 1298 - Intimatio sententiae fieri
potest vel tradendo exemplar sententiae partibus vel earum procuratoribus aut
eisdem mittendo idem exemplar ad normam can. 1192.
Can. 1299 - § 1. Si in textu sententiae aut
error irrepsit in calculos aut error materialis accidit in transcribenda parte
dispositiva sententiae vel in factis vel partium petitionibus referendis aut
omissa sunt ea, quae can. 1295, § 4 requirit, sententia ab ipso tribunali, quod
eam tulit, corrigi vel compleri debet sive ad instantiam partis sive ex
officio, semper tamen auditis partibus et decreto ad calcem sententiae
apposito. § 2. Si qua pars refragatur, quaestio incidens decreto definiatur.
Can. 1300 - Ceterae iudicis pronuntiationes
praeter sententiam sunt decreta, quae, si mere ordinatoria non sunt, vim non
habent, nisi saltem summarie motiva exprimunt vel ad motiva in alio actu
expressa remittunt.
Can. 1301 - Sententia interlocutoria vel
decretum vim sententiae definitivae habent, si iudicium impediunt vel ipsi
iudicio aut alicui ipsius gradui finem ponunt, quod attinet ad aliquam saltem
partem in causa.
|