|
Confestim autem post mortem Chilperici Gararicus dux
Limovicas accesserat et sacramenta de nomine Childeberthi susceperat. Exinde Pectavis
veniens, ab ipsis receptus est et ibi morabatur. Audiens vero quae Toronici
patiebantur, mittit legationem, obtestans, ne nos ad partem Gunthchramni regis
tradere deberimus, si nobis vellimus esse consultum; sed meminirimus potius
Sigyberthi, qui quondam genitur Childeberthi fuit. Nos vero haec rursum
episcopo et civibus mandata remisimus, quod, nisi se ad tempus Gunthchramno
rege subderent, similia paterentur, adserentes, hunc esse nunc patrem super
duos filios, Sigyberthi scilicet et Chilperici, qui ei fuerant adoptati; et sic
tenere regni principatum, ut quondam Chlotharius rex fecerat, pater eius. His
quoque non adquiescentibus, Gararicus de civitate egreditur, quasi exercitum
adducturus, in urbe vero Eberonem cubicularium Childeberthi regis relinquens.
Sicharius vero cum Willachario Aurilianense comite, qui tunc Toronus acceperat,
exercitum contra Pectavos commovit, ut scilicet ab una parte Toronici, ab alia
Biturigi commoti cuncta vastarent. Qui cum ad terminum propinquassent ac domus
cremare coepissent, miserunt ad eos Pectavi legatos, dicentes: 'Petemus, ut
usque in placito, quod inter se Gunthchramnus et Childeberthus regis habent,
susteneatis. Quod si convenit, ut pagos hos rex Gunthchramnus accipiat, non
resistemus; sin aliud, dominum nostrum recognuscimus, cui servire plenius
debeamus'. Ad haec illi responderunt: 'Nihil nobis de hac causa pertinet, nisi
tantum iussa principis adimplere. Nam si nolueritis, cuncta ut coepimus
devastamus'. Cumque in hoc res ageretur, ut universa incendio, praedae adque
captivitati traderentur, eiectis de civitate hominibus Childeberthi, sacramenta
Gunthchramno rege dederunt, non longo tempore ea custodientes.
|