35. Hic cum esset clarissimo genere inclitus, et
Heinrici Saxoniae ducis filiae Gerbergae conjugio nimium felix, in nimiam prae
insolentia temeritatem praeceps ferebatur; in disciplina militari ex audatia
nimius, adeo ut quodcumque inevincibile, appetere non metueret; corpore
mediocri et denso, duroque membrorum robore, cervice inflexibili, oculis
infestis atque inquietis, sicque mobilibus ut eorum color nemini ad plenum innotuerit;
pedibus omnino inpatientibus; mente levi. Oratio ejus, ambigua ratione
consistens, interrogatio fallens, responsio anceps; orationis partes, raro
dilucidae sibi cohaerebant; suis adeo profusus, aliena enormiter sitiens;
majoribus ac sibi aequalibus coram favens, occulte vero invidens; rerum
confusione ac mutua dissidentium insectatione plurimum gaudens.
|