36. Talis itaque in regem nimia animositate
ferebatur. Meditabatur quoque regis abjectionem admodum, ac plurimum id pertractabat
apud eos qui in Belgica potiores videbantur, non quidem Rotberto, sed sibi
regnum affectans; sua quoque principibus pene omnia distribuens. Et majores quidem
praediis et aedibus egregiis inclite donabat, mediocres autem auri et argenti
talentis efficaciter illiciebat. Fit itaque multorum ex Belgica cum eo
consensus. Sed hoc satis improvide ac inconsulte. Nam licet ob magna beneficia
comparatos sibi attraxisset, non tamen ex jurejurando ad patrandum facinus sibi
annexuit. Leviter ergo attracti, leviter post dissociati fuere.
|