38. Gislebertus vero in oppido Harbure, quod
hinc Mosa et inde Gullo fluviis vallatur, a fronte vero immani hiatu, multoque
horrore veprium defensum est, cum paucis claudebatur. Huc rex cum exercitu
properat, locatque obsidionem, hinc et inde navatem, a fronte vero equestrem.
In cujus expugnatione cum persisteret, Gislebertus navali fuga dilabitur. Oppidani vero
capti, in regis deveniunt jussionem. Gislebertus autem cum duobus clientulis,
paterna hereditate privatus, Rhenum exulaturus pertransit. Ibique per annos
aliquot apud Heinricum socerum deceptus exulat. Evoluto autem aliquot annorum
tempore, Heinricus apud regem suasorie aegit, ut Gislebertus revocaretur, ac in
regis gratiam resumeretur, ea vero rerum conditione, ut regis sententia ex
collatis beneficiis intemerata, Gislebertus ea tantum regali clementia
reciperet, quorum possessores per tot sui exilii tempora jam obierant.
|