41. Tempore vero constituto, cum rex Tungros
redisset, ibique privatus resideret, urbem Suessonicam Rotbertus ingreditur.
Apud quem ex tota Celtica primates collecti, qua ratione regem abjiciant,
constantissime consultant. Nec defuit Gislebertus ab Belgica, qui mox absque
deliberatione Rotbertum regem creandum perstrepebat. Communi ergo omnium qui aderant
decreto, Rotbertus eligitur (Jun. 29); ac multo ambitionis elatu Remos deductus
in basilica sancti Remigii rex creatur. A cujus coronatione peracto triduo,
Heriveus Remorum metropolitanus diutina egritudine vexatus, interiit (Jun. 2).
Qui si eodem tempore valuisset, tanto facinori oportunitas non patuisset. Cui
etiam mox succedit donatus ab Rotberto Seulfus, qui tunc urbis ejusdem officio
fungebatur archidiaconatus; vir strenuus multaque rerum scientia inclitus.
|