42. (923.) Interea Karolus a Gallis praeter
paucissimos Belgarum desertum sese comperiens, apud praecipuos eorum qui a se
non defecerant, plurimam de suo infortunio agitabat querelam. Miseriorem sese
inquiens si hac urgeatur calamitate, quam si oculos claudat suprema morte, cum
illa dolores augescant, ista demantur. Carius quoque sibi ferro occidi, quam
regno a pervasore privari. Post regni enim privationem, solummodo superesse in
exilium deportationem. In quo etiam ab iis quos summo semper habuit amore, apud
quos diutius conversatus sit, quibus quoque nihil umquam mali molitus fuerit,
debere sese suffragia accipere memorabat.
|