44. Mox quoque et regio jussu accersiuntur ex
Belgica, quicumque ab rege non defecisse videbantur. Quorum collectorum numerus, ut
fertur, vix in decem milibus putabatur. Et tamen in quantum perspici valuit,
nullus militiae ineptus admissus est. Omnes corpore valentes, et non inertes
pugnae. Omnes quoque in tirannum unanimes. His rex circumseptus, per Condrucium
Hasbaniumque procedit in hostem. Ereptumque regnum irrumpens, sedem regiam
Atiniacum pridem suam ingreditur. Ibique aliquantisper reparato exercitu, in
adversarium fertur.
|