50. Rollonis pyratae interitus suorumque ruina.
Quorum princeps Rollo sufficientibus copiis oppidum implens, bello sese
manifeste paravit. Rex inde digressus, exercitum provocanti infert, congredi
non differens. Oppidum aggressus est. Et obsidione disposita, vallum quo
cingebatur, irrumpit. Atque sic tirones peribolum conscendentes, adversarios
pervadunt. Oppidoque potiti, mares omnes trucidant. Feminis intactis parcunt.
Oppidum diruunt atque comburunt. Cujus incendiis aere densato ac denigrato, in
tetra caligine nonnulli evadentes, finitimam quandam occupant insulam. Quos
sine dilatione exercitus aggressus appetit, ac navali pugna victos opprimit.
Piratae vitae spem amittentes, alii sese fluctibus immergunt ac enecantur, alii
enatantes ab observatoribus jugulati sunt, alii nimia formidine tacti tetis
propriis sese appetunt. Et sic omnibus ademptis praedaque direpta non modica,
rex Belvacum rediit, ibique resedit.
|