3. Legatio Gallorum ad Adelstanum regem pro
Ludovico. Legationem etiam promulgantes: Ducis, inquiunt, benivolentia, atque
omnium qui in Galliis potiores sunt, huc per undas ignoti maris devenimus;
tanta est omnium voluntas, omniumque consensus. Divae memoriae Rodulfo orbi
subtracto, dux Ludovicum succedere procuravit, cum id multi inviti concederent,
eo quod de patris captione filium adeo suspectum haberent. Attamen duci
elaboranti, id ab omnibus jocundissime concessum est. Ludovico ergo omnes bene
per omnia optant. Nec sibi quicquam majus aut carius est ejus salute. Illum
itaque omnes reddi petunt, quem in Galliis utiliter regnare cupiunt. Tempus
constitui volunt, quo regnaturo ad ipsa maris litora dux cum princibus
occurrat. Adelstanus rex ac si barbaris non satis credens, ab eis fidem per
sacramenta super hoc quaerit, et ad votum accipit. Tempus quoque colloquii
habendi statuitur. Legati ab rege munerati atque digressi, in Gallias mari
remenso redeunt, ab rege gratias duci referentes, ac pro regis creandi
advocatione multam ejus amicitiam pollicentes. Dux itaque cum Galliarum
principibus domnum regem excepturi, Bononiam veniunt, ac secus ipsas litoreas
arenas collecti, tuguriorum incendio presentiam suam, iis qui in altero litore
erant ostendebant. Ibi enim Adelstanus rex cum regio equitatu nepotem praestolantibus
Gallis missurus aderat. Cujus jussu domus aliquot succensae sese advenisse
trans positis demonstrabant.
|