8. (938.) Oppidum Montiniacum rex per cohortem
expugnat ejusque principem capit. Quibus digressis rex ad oppidum Montiniacum
cohortem mittit, quae illud occupet, captumque diruat, eo quod Serlus quidam
latrocinia exercens, illic receptui sese habebat. Cohors ergo oppidum appetens,
latrones impugnat. Nec morata vi capit, comburit, ac subruit. Latronem
principem comprehensum dimissis minoribus regi deducit. Qui cum jussu regio gladiatori decollandus traderetur,
Artoldi Remorum metropolitani interventu gratiam ab rege obtinuit, ac sese
ulterius non latrocinaturum juratus, abire permissus est. His ita gestis, rex
in partes Belgicae mari contiguas concessit, oppidum in ipso maris portu
exstruere nisus. Cui etiam loco Guiso est nomen. Exceptusque ab Arnulfo
regionis illius principe, apud eum de oppidi erectione agebat. Ubi dum in
agendo moras faceret, castrum Remensis aecclesiae nomine Causostem secus
fluvium Matronam situm ab Artoldo praesule editum, Heribertus proditione
ingreditur ac capit, Castrensesque invadens, eorum potiores abducit. Rura
circumquaque depopulatur, ac ingentibus praedis oppidum implet, et cum armis
milites ibi deponit, aliorsum ipse secedens.
|