9. Rex
Lauduni arcem capit. Interea regi ab metropolitano per legatos ista
suggeruntur. Qui mox coeptum negotium intermittens, suo auxiliaturus regreditur.
Milites colligit, ac exercitum parat. Cum quo Laudunum veniens, arcem ab
Heriberto nuper ibi exstructam et a suis adhuc detentam obsidet. At qui in arce
erant, rebellioni sese parant. Rex ergo
circumcirca sagittarios adhibens, missilibus evincere instabat. In quo tumultu
hinc inde quam plures sauciati fuere, cum non minus qui in arce erant, sagittis
aliisque missilibus uterentur. Rex ergo cum finem oppugnandi viribus non
fecisset, ingeniose eos capere cogitabat.
|