10. Machinae compositio. Fecit itaque ex
vehementissimis lignis compactis, machinam, instar longilaterae domus, duodecim
virorum capacem, humani corporis staturae in alto aequalem, cujus parietes de
ingenti lignorum robore, tectum vero de duris ac intextis cratibus exstruxit.
Cui etiam intrinsecus rotas quatuor adhibuit, unde machina ab iis qui
intrinsecus laterent, usque ad arcem impelleretur. At tectum non aeque stratum
fuit, verum ab acumine dextra levaque dependebat, ut jactis lapidibus facilius
lapsum praeberet. Quae exstructa, tironibus mox impleta est, ac ad arcem rotis
mobilibus impulsa. Quam cum a superioribus hostes rupibus opprimere conarentur,
a sagittariis undique dispositis, contumeliose repulsi sunt. Ad arcem itaque
machina deducta, murus ex parte suffosus atque eversus est. Hostes multitudinem
armatorum per hunc hiatum possibile introduci formidantes, arma deponunt, ac
regiam clementiam implorant. Rex ergo amplius tumultuari prohibens, intactos
pene comprehendit, praeter hos qui in militari tumultu sauciati fuere, suosque
ad urbis tutelam in arce deposuit.
|