12. Ingressus Arnulfi in Monasteriolum. Arnulfus
itaque militum electorum copiam colligit, facinus quaesitum patraturus. Iterque
carpens cum duabus cohortibus usque oppidum pene devenit. Sol jam occiderat.
Proditor per portam quosdam emiserat, acsi aliqua utilia curaturos. Unde et
ipse in muro stans, facem ardentissimam praetendebat, veluti famulis emissis
lumen ministraturus, quo etiam luminis signo per legatos aditum significaverat.
Huc Arnulfus cum equitatu irruens, per portam patentem oppidum ingressus est.
Eoque potitus, Erluini uxorem cum filiis capit, ac ejus thesauros diripit.
Erluinus vero habitu immutato, e medio hostium elapsus est. Arnulfus quoque
omnibus pervasis, oppido suos deputat, Erluini uxorem cum natis Aedelstano regi
Anglorum servandos trans mare deportat. Sicque ad sua oppido suis munito
rediit.
|