17. Rex in Belgica suos sibi sociat et Ottonis
fautores ultra Rhenum fugat. Rex in pago Elisatio cum Hugone Cisalpino principe
locutus, Belgicos exteriores qui ad se nondum venerant, sibi asciscebat. Et qui
partibus Ottonis favebant, ultra Rhenum fugere compulit. Presenserat enim
Ottonem velle in suum jus Belgicam transfundere. Unde et equo ei non ferebatur
animo. Truculentius ergo contra illum agitans, suos de regno exturbavit. Qui
vero sibi consentiebant asciscens, Gislebertum videlicet Belgicorum ducem,
Theodericum quoque atque Isaac comites, cum eis consilium confert, ac pro fide
habenda jusjurandum ab eis accipit, post haec Laudunum rediens. Ibique ejusdem
urbis episcopum Rodulfum, proditionis evidentissime insimulatum, ab urbe
pellit, suosque simul ejicit. Quorum etiam res suis contulit.
|