20. (940.) Wilelmus dux piratarum regi contra
omnes fidem jurat. Dum haec Lauduni gererentur, Wilelmus piratarum dux, legatos
regi dirigit, qui sese satis ei fidelem indicent: quo rex jubeat, sese
occursurum, fidemque contra omnes polliciturum. Quorum legationem rex multa benivolentia excipiens in pagum Ambianensem
sibi occurrendum constituit, eo quod ibi specialiter utilia quaedam per illos
determinanda forent. Legatis itaque abductis, rex ad locum condictum tempore
statuto devenit. Cui etiam dux praedictus obvius venit. Exceptusque a rege
decenter, provinciam quam ei pater Karolus rex contulerat, ab eo etiam accepit.
Unde
et regis factus, tanto ei consensu alligatus est, ut jam jamque aut sese
moriturum, aut regi imperii summam restituturum proponeret.
|