24. Rege adveniente obsidio solvitur. Jamque
ebdomadas septem obpugnaverant, cum rex hujus rei accitus nuntio, in Campania
Remensi tempestivus affuit. Et licet cum paucis, fluvium tamen Axonam permeat,
et sic in hostes fertur. Quo comperto
tiranni, regis quoque animum simulque et aequitatem perpendentes, ab obsidione
discedunt. Rex vero ingressus, victus necessaria suis paravit, ac quaeque
commoda ordinavit. Sicque alia dispositurus, Burgundiam repetit. In cujus
discessu, Wido Suessorum episcopus a desertoribus suasus, eo quod et ipse eorum
partes latenter tueretur, Remos veniens, Heriberti filium Hugonem, presbiterum
ordinavit. Unde et eum pater sacerdotali dignitate ampliare cupiens, ut
Artoldus pontificatus apice legaliter privaretur, instanter quaerebat. Cujus
rei rationem cum Hugone duce contulit, ac in effectum redigi admodum petiit.
|