25.
(941.) Artoldus a comprovincialibus episcopis repudiatur et pro eo Hugo
eligitur. Disposita ergo rationum summa,
Remensis dioceseos episcopos convocant, qui inter Artoldum et Hugonem,
controversiam determinent, objectorumque finem constituant. Collecti ergo apud
urbem Suessonicam, in basilica sanctorum martirum Crispini et Crispiniani,
civium Remensium querelam excipiunt, dicentium sese diutissime pastore
destitutos: cui subdantur et obsequantur, suppliciter expetere. Artoldum jam se
nolle, eo quod sacramento episcopium repudiaverit; at Hugonem, quod omnium
unione electus, omnibusque acceptissimus sit. Quorum quaerimoniis episcopi
annuentes, sacerdotio dignum Hugonem asserunt, eo quod non solum carnis
nobilitas, set et animi mores pudici plurimum eum commendarent. Ratum etiam
fore, si tanti honoris culmen, personae nobilitate adornetur. Hugonem itaque
pene omnium conibentia attollunt, ac Remos deductum, in coenobio monachorum
sancti Remigii metropolitanum sollempniter consecrant, atque in urbe decenter
exceptum, multo obsequio ac reverentia honorant. Rex in partibus Burgundiae
viatorum relatu, patratum negotium advertens, mox Laudunum rediit. Arnoldum
quoque ac ejus fratrem Landricum proditionis insimulatos, nec tamen penitus
convictos, cum in hac re promptissimi viderentur, ab urbe expulit.
|