26. Rex in partibus Burgundiae exercitum contra
tirannos colligit. Rex cum rei militaris inopia contra tirannos nihil moliri
valeret, Burgundiam repetiit, ut exercitum inde sumeret, Remisque induceret.
Admodum etenim id attemptabat, ut Heribertum ab urbe pervasa pelleret. Dum ergo
in colligendis militibus moram faceret, tiranni multo equitatu Laudunum
appetunt, atque circumdant, spem proditionis in quibusdam habentes. Haec dum
aguntur, ad regis aures tempestive feruntur. Qui sumptis quos undecumque
colligere valuit, in pagum Porcensem devenit. Ubi cum rem militarem ordinaret,
ac hostibus bellum inferre pararet, tiranni Lauduni obsidione relicta, in regem
vadunt, ac insperatum invadentes ejus exercitum, nonnullos sternunt, reliquos
vero in fugam cogunt. Rex a suis eductus, vix cum duobus comitibus, vim mortis
evasit, oppido quod Altus mons dicitur sese recipiens. Tiranni spe proditionis frustrati, obsidionem solvunt,
atque in sua concedunt.
|