29. Ludovicus et Otto reges in amiciciam
conveniunt, ac per Ottonem Hugo. Rex principibus in pace dimissis, cum paucis
iter in Belgicam retorquet, Ottoni cujus sororem conjugem sibi addixerat, ad
loquendum obveniens. Quorum consilio
multa concordia firmato, amicitiam mutuo conditionibus statuunt. Ac fine
negotii facto, rex Laudunum rediit. Otto vero Hugonem in regis gratiam reducere
satagebat. Quem multis verborum stimulis familiariter ac levi furore
redarguens, eo quod regi suo contrairet, dominumque insectari non formidaret,
ad regem redire effecit. Et tempore oportuno, prudentium legationibus
praemissis, regi ducem reducit, sibique conciliat.
|