38. Congressio Arnulfi et Erluini. Quod cum
malivolorum relatione Arnulfus comperisset, insidias praetendit, obvenientique
rege ignorante cohortem inducit. Quod Erluinus mox dinoscens, signis collatis
congreditur. Congressus utrimque non modicus. Arnulfus suis fusis, profugiens,
vix urgentem evasit. Erluinus victoria potitus, alios enecat, alios capit,
alios in fugam cogit. In quo etiam certamine, interfectorem Wilelmi qui cum
Arnulfo sibi vim intulerat militari insectatione comprehendit. Cujus manus
obtruncans, in ultionem amici Rodomum misit. Ac cesorum ereptis manubiis, ad
regem concessit.
|