39. Quo
tempore Hugo dux in magna gratia regi habitus, ejus filiam ex sacro lavacro
suscepit. Unde et eum rex omnium Galliarum ducem constituit. Quo duce rex
equitatum parans, cum Gerberga regina in Aquitaniam proficiscitur (944). Ac
urbem Nivernicam deveniens, Gothorum ducem Ragemundum Aquitanorumque praecipuos
illic obvios excepit. Apud quos de provinciarum cura pertractans, ut illorum
omnia sui juris viderentur, ab eis provincias recepit. Nec distulit earum
administrationem eis credere. Commisit itaque ac suo dono illos principari
constituit, regia hilaritate hilares redire permittens; ac cum duce iter ipse
in Galliam retorquens, Lauduni sese recepit.
|